ترکیہ کے صدر رجب طیب اردوان اور ان کے امریکی ہم منصب ڈونلڈ ٹرمپ کی پیر کو ٹیلی فون پر گفتگو ہوئی ہے جس میں دونوں رہنماؤں نے باہمی دلچسپی کے امور اور بین الاقوامی معاملات پر تبادلۂ خیال کیا۔
ترکیہ کے کمیونیکیشنز ڈائریکٹوریٹ کے مطابق اردوان اور ٹرمپ نے دونوں ملکوں کے باہمی تعلقات پر تبادلۂ خیال کیا، دفاعی شعبے میں تعاون اور علاقائی و عالمی امور پر بھی گفتگو کی جس میں وینزویلا اور غزہ کے معاملے پر بھی بات ہوئی۔
اس سے قبل صدر اردوان کا کہنا تھا کہ انہوں نے ٹرمپ کے ساتھ ٹیلی فونک گفتگو میں انہیں انقرہ کی حساسیت سے آگاہ کیا۔
ترک صدر کا کہنا تھا کہ 'صدر ٹرمپ کے ساتھ رابطے کے دوران ہم نے ترکیہ کی حساسیت ان تک پہنچائی۔ ہم نے زور دیا کہ وینزویلا کو عدم استحکام کی طرف نہیں لے جانا چاہیے۔'
صدر اردوان نے کابینہ کے اجلاس کے دوران گفتگو کرتے ہوئے کہا کہ ترکیہ اور ترک قوم وینزویلا کے دوستانہ عوام کی خوش حالی، امن اور ترقی کے لیے ان کے ساتھ کھڑی رہے گی۔
