امریکہ نے آبنائے ہرمز کھلوانے کے لیے بین الاقوامی برادری رابطے شروع کر دیے ہیں اور وہ کئی ملکوں پر زور دے رہا ہے کہ ایک اتحاد قائم کر کے اس بحری راستے پر آزادانہ نقل و حرکت کو بحال کریں۔
برطانوی خبر رساں ادارے 'رائٹرز' کے مطابق اس نے امریکی محکمۂ خارجہ کا ایک مراسلہ دیکھا ہے جس میں ملکوں سے یہ مطالبہ کیا گیا ہے۔
امریکہ اور اسرائیل کی ایران کے ساتھ جاری جنگ کو دو ماہ ہو چکے ہیں اور اس عرصے کے دوران یہ اہم آبی گزرگاہ بند رہی ہے۔ آبنائے ہرمز سے دنیا کا 20 فیصد تیل و گیس گزرتا ہے۔ اس کی بندش سے دنیا بھر میں خام تیل اور پیٹرولیم مصنوعات کی قیمتیں آسمان سے باتیں کر رہی ہیں۔
محکمۂ خارجہ کے مراسلے میں کہا گیا ہے کہ امریکہ دیگر ملکوں کو ایک نئے بین الاقوامی اتحاد میں شمولیت کی دعوت دے رہا ہے۔ یہ اتحاد آبنائے ہرمز میں بحری جہازوں کی محفوظ آمد و رفت یقینی بنائے گا۔
مراسلے کے مطابق یہ مجوزہ اتحاد جسے 'میری ٹائم فریڈم کنسٹرکٹ' کا نام دیا گیا ہے، معلومات کے تبادلے، سفارتی رابطے برقرار رکھنے اور پابندیوں کے نفاذ میں مدد دے گا۔
فرانس، برطانیہ اور دیگر ملکوں نے بھی ایک ایسا ہی اتحاد قائم کرنے کی بات کی ہے لیکن انہوں نے واضح کیا ہے کہ وہ اتحاد جنگ کے خاتمے کے بعد آبنائے ہرمز کھلوانے کے لیے قائم کیا جا سکتا ہے۔
ایران واضح کر چکا ہے کہ جب تک اس کے لیے خطرہ موجود ہے اور حملے جاری ہیں، وہ آبنائے ہرمز بند رکھے گا جس سے خام تیل کی قیمتیں 200 ڈالر فی بیرل تک بھی پہنچ سکتی ہیں۔
