مالدیپ نے اعلان کیا ہے کہ وہ فلسطینی عوام کے ساتھ یکجہتی کے اظہار کے طور پر اسرائیلی شہریوں کے داخلے پر پابندی عائد کر رہا ہے۔
اسرائیلی شہریوں کے داخلے پر پابندی کے لیے مالدیپ کی پارلیمنٹ میں پیش کیا گیا بل منظور ہوگیا جس کے بعد یہ قانون بن گیا۔ صدر محمد معیظو نے بھی اس قانون پر دستخط کردیے ہیں۔
صدر کے دفتر سے جاری بیان میں کہا گیا کہ ’اس قانون کی منظوری یہ ظاہر کرتی ہے کہ حکومت اسرائیل کے فلسطینیوں پر ظلم اور قتل عام کے خلاف سخت مؤقف رکھتی ہے۔ مالدیپ فلسطینی شہریوں کے ساتھ یکجہتی کا اظہار کرتا ہے۔‘
صدر معیظو کے دفتر کے ترجمان نے اے ایف پی کو بتایا کہ پابندی فوری طور پر نافذ کر دی گئی ہے۔
مالدیپ ایک چھوٹا اسلامی ملک ہے جو ایک ہزار 192 چھوٹے جزیروں پر مشتمل ہے۔ یہ اپنے خوبصورت سفید ریت والے ساحلوں، نیلے شفاف پانی، اور پُرسکون تفریحی مقامات کی وجہ سے دنیا بھر میں مشہور ہے۔
سرکاری اعداد و شمار کے مطابق صرف فروری میں 59 اسرائیلی سیاحوں نے مالدیپ کا دورہ کیا، جب کہ اسی مہینے مجموعی طور پر 2لاکھ 14 ہزار غیر ملکی سیاح آئے تھے۔
